"ಕಡಲಾಚೆಯ ಕನ್ನಡಿಗ" ಬಿರುದಾವಳಿ

 ಕೆಲವು ವರ್ಷಗಳ ಹಿಂದೆ ಮೈಸೂರಿನ ಜಿಲ್ಲಾ ಸಾಹಿತ್ಯ ಭವನದಲ್ಲಿ ಒಂದು ಪುಸ್ತಕ ಬಿಡುಗಡೆ ಸಮಾರಂಭಕ್ಕೆ ನನ್ನ ಪ್ರಕಾಶಕರೊಂದಿಗೆ ಹೋಗಿದ್ದೆ. ಅಂದು ಅತಿಥಿಯಾಗಿ ಬರಬೇಕಿದ್ದ ಶಾಸಕರೊಬ್ಬರು ಕೈ ಕೊಟ್ಟ ಕಾರಣ ನನ್ನನ್ನೇ ಅತಿಥಿಯಾಗಿ ಕೂರಿಸಿದರು. ಇತಿಹಾಸ ಕುರಿತಾದ ಪುಸ್ತಕ ಅದಾದ್ದರಿಂದ ಕೊಂಚ ಉತ್ಸಾಹದಿಂದಲೇ ಮಾತನಾಡಿದೆ. 

ಸಮಾರಂಭ ಮುಗಿದ ನಂತರ ಸಭಿಕರೊಂದಿಗೆ ಮಾತನಾಡುತ್ತಿರುವಾಗ ನೀಲಿ ಶಾಲು ಹೊದ್ದ ಒಬ್ಬರು ನನ್ನ ಬಳಿಗೆ ಬಂದರು. ಅವರ ಕೈಯಲ್ಲಿ ನನ್ನ "ಭಾರತ ಒಂದು ಮರುಶೋಧನೆ" ಪುಸ್ತಕವಿತ್ತು. "ಇದನ್ನು ಚೆನ್ನಾಗಿ ಬರೆದಿದ್ದೀರಿ. ನಿಮಗೆ "ಕಡಲಾಚೆಯ ಕನ್ನಡಿಗ" ಎಂಬ ಬಿರುದು ಕೊಟ್ಟು ಸನ್ಮಾನ ಮಾಡುತ್ತೇವೆ. ಇನ್ನು ಎಷ್ಟು ದಿನ ಮೈಸೂರಿನಲ್ಲಿರುವಿರಿ?" ಎಂದರು.

ಅದಕ್ಕೆ ನಾನು, "ಅಯ್ಯೋ ಅದೆಲ್ಲಾ ಏನೂ ಬೇಡ ಇವರೇ. ನಾನೊಬ್ಬ ಸಾಮಾನ್ಯ ಅಷ್ಟೇ. ನಾನು ಇನ್ನೊಂದು ವಾರ ಅಷ್ಟೇ ಇರುವುದು. ನಾನು ಮೈಸೂರಿನಲ್ಲಿ ಇರುವುದಿಲ್ಲ" ಎಂದೆ.

ಆಗ ಅವರು, "ಇಲ್ಲಿಲ್ಲ, ಅಷ್ಟರೊಳಗೆ ಸಮಾರಂಭ ಏರ್ಪಡಿಸುತ್ತೇವೆ. ನಿಮ್ಮ ನಂಬರ್ ಕೊಡಿ" ಎಂದು ನನ್ನ ನಂಬರ್ ತೆಗೆದುಕೊಂಡರು.

ನಾನು, "ಅರೆ, ಇವರು ಪರವಾಗಿಲ್ಲ. ಒಳ್ಳೆಯ ಉದಾರವಾದಿಗಳು. ನೆನ್ನೆ ಸಂಜೆ ನನ್ನ ಮರುಶೋಧನೆಯನ್ನು ಜೀರ್ಣಿಸಿಕೊಳ್ಳದೆ ಹಣಿಯಲು ನೋಡಿ ಸೋತಿದ್ದ ಕೃತ್ರಿಮ ಉದಾರವಾದಿಗಳ ನಡುವೆ ನಿಜದ ಉದಾರವಾದಿಗಳು ಮರುದಿನವೇ ಸಿಕ್ಕರಲ್ಲ" ಎಂದು ಖುಷಿಪಟ್ಟಿದ್ದೆ. 

ನಾನು ವಿಮಾನ ಹತ್ತುವ ಎರಡು ದಿನದ ಮುಂಚೆ ಆ ನೈಜ ಉದಾರವಾದಿ ನೀಲಿ ಶಾಲಿಗರು ಫೋನ್ ಮಾಡಿದರು, "ಸರ್, ನಮಗೆ "ಅಂಬೇಡ್ಕರ್ ಪುರಸ್ಕಾರ" ಸಿಕ್ಕಿದೆ. ಅದಕ್ಕೆ ನಮ್ಮ ಸಂಘದ ವತಿಯಿಂದ ಹತ್ತು ಜನ ದೆಹಲಿಗೆ ಹೋಗಬೇಕು. ನಿಮಗೆ ಸನ್ಮಾನ ಇಟ್ಟುಕೊಳ್ಳುತ್ತೇವೆ ಎಂದಿದ್ದೆನಲ್ಲ. ಪ್ರತಿಯಾಗಿ ನೀವು ನಾವು ಹತ್ತು ಜನಕ್ಕೆ ಬೆಂಗಳೂರಿನಿಂದ ದೆಹಲಿಗೆ ಒನ್ ವೇ ವಿಮಾನದ ವೆಚ್ಚ ಕೊಡಿ. ಬರುವಾಗ ರೈಲಿನಲ್ಲಿ ಬರುತ್ತೇವೆ. ನಮ್ಮ ಟ್ರಾವೆಲ್ ಏಜೆಂಟನ ಅಕೌಂಟ್ ನಂಬರ್ ಕಳಿಸುತ್ತೇನೆ" ಎಂದರು.

ಹೀಗೆ ಉದಾರ ಉದರವಾಯಿತು!

ನಾನು, "ನೋಡಿ, ಭಾರತದ ಯಾವುದೇ ಬ್ಯಾಂಕಿನಲ್ಲಿ ನನ್ನ ಖಾತೆ ಇಲ್ಲ. ಅದಕ್ಕೆ ನಾನು ಕಡಲಾಚೆ ಹೋಗಿಯೇ ಹಾಕಬೇಕು. ಮೇಲಾಗಿ ಘನ ಸಂವಿಧಾನವೆತ್ತ ಪ್ರಜಾಪ್ರಭುತ್ವ ಭಾರತ ಒಕ್ಕೂಟವೇ ನನಗೆ "ಸಾಗರೋತ್ತರ ಭಾರತೀಯ" ಎಂಬ ಬಿರುದು ಬಿನ್ನಾವಳಿಯನ್ನು ಕೊಟ್ಟಿದೆ. ಹಾಗಾಗಿ ಕಡಲಾಚೆಗೆ ಬೇರೆ ಕನ್ನಡಿಗರನ್ನು ವಿಚಾರಿಸಿ" ಎಂದು ಫೋನ್ ಇಟ್ಟೆ.

ಈಗ ಮೊನ್ನೆಯಷ್ಟೇ ಅರ್ಜಿ ಹಾಕಿ ಮರ್ಜಿ ಹಿಡಿದು ಪ್ರಶಸ್ತಿಗೆ ಗೋಗರೆಯುವ ತೆವಲಿನ ಲೇಖಕ/ಕಿ/?/ಯರ ಕುರಿತು ಪೋಸ್ಟ್ ಬರೆದಿದ್ದೆನಷ್ಟೆ. ಇಂದು ಅದೇ ಮರ್ಜಿ ಹಿಡಿಯುವ ಚಾಳಿ ಎಲ್ಲೆಲ್ಲಿಗೆ ತೇಲಿ ಹೋಗುತ್ತದೆ ಎಂದು ಪತ್ರಿಕೆಯೊಂದರ ಗಾಳಿಸುದ್ದಿಯ ಮೂಲಕ ಗೊತ್ತಾಯಿತು.

ಘೋಸ್ಟ್/ಹೋಸ್ಟ್/ಟೋಸ್ಟ್ ಬರಹಗಾರರು ಅಧಿಕಾರಸ್ಥರ ಹೆಂಡಂದಿರಿಗೆ ಕವನ ಸಂಕಲನ ಬರೆದುಕೊಡುವ ಬಗ್ಗೆ, ರಾಜಕಾರಣಿಗಳಿಗೆ ಆತ್ಮಕಥೆ, ದರ್ಶನ, ಇತ್ಯಾದಿ ಬರೆದುಕೊಡುವ ಬಗ್ಗೆ, ಪಿಹೆಚ್ದಿ ಶೋಷಣೆಗಳ ಬಗ್ಗೆ, ಹಾಸಿಗೆ ರಿವಾರ್ಡುಗಳ ಬಗ್ಗೆ ನನ್ನ ಅತ್ಯಂತ ಆತ್ಮೀಯ ಉದಾರವಾದಿ ಆಪ್ತರಲ್ಲೇ ಕೇಳಿದ್ದೆ. ಅದರ ಸತ್ಯಾಸತ್ಯತೆಯನ್ನೂ ತಿಳಿದುಕೊಂಡಿದ್ದೆ. ಅವರುಗಳು ಹೇಳಿದ್ದೆಲ್ಲವೂ ಸತ್ಯವಾದರೂ ಇಂದು ಕೇಳಿದ್ದನ್ನು ಮಾತ್ರ ನಂಬಲಾಗದು, ನಂಬೆನು.

#ಭಾರತವೆಂಬೋಹುಚ್ಚಾಸ್ಪತ್ರೆಯಲ್ಲಿ

#ಕರ್ನಾಟಕವೆಂಬೋಕಮಂಗಿಪುರದಲ್ಲಿ

ಬಿಟ್ಟಿ ಮತ್ತು ಗಟ್ಟಿ ಭಾಗ್ಯಗಳು

 ಯಾವ ಭಾಗ್ಯವು ಒಂದು ನಿರ್ದಿಷ್ಟ ಗುರಿಯಿಲ್ಲದೆ ದುರ್ಬಲರನ್ನು ದುರ್ಬಲವಾಗಿಯೇ ಇರಲು ಬಿಟ್ಟು ಅನಿರ್ದಿಷ್ಟ ಕಾಲಾವಧಿಯವರೆಗೆ ಅಥವಾ ಹಣ ಖರ್ಚಾಗುವವರೆಗೆ ಇರುವುದೋ ಅದು ಬಿಟ್ಟಿ ಭಾಗ್ಯ. ಯಾವ ಭಾಗ್ಯವು ಒಂದು ನಿರ್ದಿಷ್ಟ ಗುರಿಯೊಂದಿಗೆ ಗುರಿ ಸಾಧಿಸಿದ ನಂತರ ಇಲ್ಲವಾಗುವುದೋ ಅದು ಗಟ್ಟಿ ಭಾಗ್ಯ.

ಬಡತನದ ರೇಖೆಯ ಕೆಳಗಿರುವ ಒಂದು ಕುಟುಂಬಕ್ಕೆ ಉಚಿತ ಆಹಾರಧಾನ್ಯಗಳನ್ನು ಸರ್ಕಾರವು ಒಂದು ನಿರ್ದಿಷ್ಟ ಅವಧಿಗೆ ಒದಗಿಸಿ ಆ ಕುಟುಂಬವನ್ನು ಅದೇ ನಿರ್ದಿಷ್ಟ ಅವಧಿಯ ಒಳಗೆ ಬಡತನದ ರೇಖೆಯಿಂದ ಮೇಲೆತ್ತುವ ಯೋಜನೆಯನ್ನು ಹಾಕಿರಬೇಕು. ಉದಾಹರಣೆಗೆ ಆರು ತಿಂಗಳ ಕಾಲ ಒಂದು ಕುಟುಂಬಕ್ಕೆ ಉಚಿತ ಆಹಾರಧಾನ್ಯ ಒದಗಿಸಿ ಆ ಕುಟುಂಬದ ವಯಸ್ಕ ಸದಸ್ಯರಿಗೆ ಉದ್ಯೋಗ ತರಬೇತಿ, ಕೌಶಲ್ಯ ಅಭಿವೃದ್ಧಿ ತರಬೇತಿ, ಮತ್ತು ತಮ್ಮದೇ ಘನ ಸರ್ಕಾರದ ಉದ್ಯೋಗ ವಿನಿಮಯ ಕೇಂದ್ರದ ಮೂಲಕ ಉದ್ಯೋಗ ಒದಗಿಸುವ ಎಲ್ಲಾ ಪ್ರಾಮಾಣಿಕ ಪ್ರಯತ್ನವನ್ನು ಮಾಡುವ ಯೋಜನೆಗಳನ್ನು ತಳುಕುಹಾಕಿ ಆ ಕುಟುಂಬವು ತಮ್ಮ ಅನ್ನವನ್ನು ತಾವೇ ಆ ನಿರ್ದಿಷ್ಟ ಅವಧಿಯ ಒಳಗೆ ಗಳಿಸಿಕೊಳ್ಳಲು ಉತ್ತೇಜಿಸಬೇಕು. ಆರು ತಿಂಗಳ ಕಾಲ ಆ ಕುಟುಂಬದ ವಯಸ್ಕ ವ್ಯಕ್ತಿಗಳು ಯಾವ ಉದ್ಯೋಗಕ್ಕೆ ಅರ್ಜಿ ಹಾಕಿದ್ದರು, ಅಥವಾ ಪ್ರಯತ್ನಿಸಿದ್ದರು ಎಂಬ ಸರಳ ದಾಖಲಾತಿಯನ್ನು ಉದ್ಯೋಗ ವಿನಿಮಯ ಕೇಂದ್ರಗಳ ಮೂಲಕ ದಾಖಲಿಸಬೇಕು. ಈ ಪ್ರಕ್ರಿಯೆಯಿಂದ ಆ ಕುಟುಂಬದ ಸದಸ್ಯರಿಗೆ ಒಂದು ನೈತಿಕ ಜವಾಬ್ದಾರಿಯನ್ನು ಹೇರಿದಂತಲೂ ಆಗುತ್ತದೆ. ಒಂದು ವೇಳೆ ಆ ನಿರ್ಧರಿತ ಆರು ತಿಂಗಳಲ್ಲಿ ಗುರಿ ತಲುಪದಿದ್ದರೆ ಮತ್ತೊಂದು ಅವಧಿಗೆ ವಿಸ್ತರಿಸಿ ಕಡೆಗೆ ಒಂದೆರಡು ಅವಧಿಗೆ ನಿಲ್ಲಿಸಬೇಕು. ಹಾಗೆ ಮಾಡಿದಾಗ ಸೋಮಾರಿಗಳು ಎಚ್ಚೆತ್ತುಕೊಂಡು ತಮ್ಮ ಅನ್ನ ಗಳಿಸುವ ಮಾರ್ಗೋಪಾಯಗಳನ್ನು ಕಂಡುಕೊಳ್ಳುತ್ತಾರೆ.

ಒಟ್ಟಾರೆ ಆದಷ್ಟು ಬೇಗ ಆ ಕುಟುಂಬವು ಬಡತನದ ರೇಖೆಯಿಂದ ಮೇಲಕ್ಕೇರಿಸುವ ಸಮಗ್ರ ಯೋಜನೆಯನ್ನು ಹಾಕಿಕೊಂಡಾಗ ಅದು ಸದೃಢ ನಾಗರಿಕ ಮತ್ತು ದೇಶವನ್ನು ಅಭಿವೃದ್ಧಿಶೀಲತೆಯ ಕಡೆ ನಡೆಸಿ ಗಟ್ಟಿ ಭಾಗ್ಯ ಎನಿಸುವುದಲ್ಲದೆ ಸರ್ಕಾರ ತನ್ನ ಜನರ ಆರ್ಥಿಕ ಅಭಿವೃದ್ದಿಯೊಂದಿಗೆ ದೇಶದ ಆರ್ಥಿಕ ಉನ್ನತಿಗೆ ಶ್ರಮಿಸಿದ ಹಾಗಾಗುತ್ತದೆ. ಹಾಗೆಯೇ ಆ ಯೋಜನೆಯ ಪರಿಣಾಮವನ್ನು ಸಮರ್ಥವಾಗಿ ಅಳೆಯಲು ಅಳತೆಗೋಲು, ಮಾಪನಾಂಶ, ಯಶಸ್ಸಿನ ಸೂತ್ರ ಒಂದು ವೈಜ್ಞಾನಿಕ ತಳಹದಿಯಲ್ಲಿ ರೂಪುಗೊಳ್ಳುತ್ತವೆ, ಸಹ.

ಆದರೆ ಇಂತಹ ದೂರಾಲೋಚನೆ ಮತ್ತು ಸಮಗ್ರ ಚಿಂತನೆ ಇರದ ಕಾರಣ ಸದ್ಯದ ಭಾಗ್ಯಗಳು ಬಿಟ್ಟಿ ಭಾಗ್ಯ ಎನಿಸಿಬಿಡುತ್ತವೆ. ಇಂತಹ ಚಿಂತನೆ ಹತ್ತು ವರ್ಷಗಳ ಹಿಂದೆ ಭಾಗ್ಯಗಳನ್ನು ಘೋಷಿಸುವಾಗಲೂ ಇರಲಿಲ್ಲ, ಈಗಲೂ ಇಲ್ಲ. ನಡುವೆ ಬಂದುಹೋದ ಸಮ್ಮಿಶ್ರ, ಪಕ್ಷಾಂತರಿ, ಕುಲಾಂತರಿ ಧಾರ್ಮಿಕ ಸರ್ಕಾರಕ್ಕೂ ಇರಲಿಲ್ಲ.  

ಇಂತಹದ್ದನ್ನು ತಿಳಿಸಬೇಕಾದ ಆರ್ಥಿಕ ತಜ್ಞರು, ಸುಶಿಕ್ಷಿತರು, ಬುದ್ಧಿಜೀವಿಗಳು, ಚಿಂತಕರು, ಪತ್ರಕರ್ತರು, ಟಾಮ್, ಡಿಕ್ ಮತ್ತು ಹ್ಯಾರಿ ಮತ್ತು ಮೇರಿಗಳು ತಮ್ಮ ತಮ್ಮ ಪಂಥೀಯ ಸಿದ್ಧಾಂತದ ಅನುಕೂಲಕ್ಕೆ ತಕ್ಕಂತೆ, "ಆಹಾ, ಇದು ಹಸಿದವರ ಸಂತೈಸುವ ಅನನ್ಯ ಯೋಜನೆ" ಎಂದು ಭಾವುಕ ಭ್ರಾಮಕ ಕತೆಯನ್ನು ಕನ್ನಡ ಧಾರಾವಾಹಿಗಳ ರೀತಿ ಧರಾಶಾಹಿಯಾಗಿ ಕಣ್ಣೀರು ಹರಿಸುತ್ತಾರೆ. ಆಚೆಯ ಬದಿಯವರು ಇದು ಸೋಮಾರಿಗಳನ್ನು ಸೃಷ್ಟಿಸುವ ಯೋಜನೆ, ನನ್ನ ತೆರಿಗೆ ಹಣ ಇದಕ್ಕೆ ಪೋಲಾಗಬಾರದು ಎಂದು ಉಗ್ರ ಪ್ರತಾಪ ತೋರುತ್ತಾರೆ.

ಮಧ್ಯೆ ಏನಾದರೂ ಇಂತಹ ಕಳಕಳಿಯ ಸಲಹೆ ನೀಡಿದ ನಮ್ಮಂತಹವರನ್ನು ಅವರರರ ಪಂಥಕೂಪದ ನಿಯಮದಂತೆ......... ಹರಹರಾ ಶ್ರೀ ಚೆನ್ನಸೋಮೇಶ್ವರ!

#ಭಾರತವೆಂಬೋಹುಚ್ಚಾಸ್ಪತ್ರೆಯಲ್ಲಿ

#ಕರ್ನಾಟಕವೆಂಬೋಕಮಂಗಿಪುರದಲ್ಲಿ