ಅರವಿಂದ ಚೊಕ್ಕಾಡಿಯರೊಂದಿಗೆ ಭೇಟಿ

 ಚಿಕಾಗೋದಿಂದ ಅಲ್ಪ ಕಾಲೀನ ರಜೆಯಲ್ಲಿ ಊರಿಗೆ ಬಂದಿದ್ದ ಮಿತ್ರ ರವಿ ಹಂಜ್ ಅವರು ಇವತ್ತು ಅವರ ಭಾರತೀಯ ವ್ಯವಸ್ಥಾಪನೆಯನ್ನು ನೋಡಿಕೊಳ್ಳುತ್ತಿರುವ ಸವಿತಾ ಅವರೊಂದಿಗೆ ಮನೆಗೆ ಬಂದಿದ್ದರು. ಅವರ ಇತ್ತೀಚಿನ ಪುಸ್ತಕಗಳನ್ನು ಕೊಟ್ಟರು.

ಮೊದಲನೆಯದಾಗಿ ಫೇಸ್ ಬುಕ್‌ನಲ್ಲಿ ಎಷ್ಟೇ ಮಿತ್ರತ್ವ ಇದ್ದರೂ ಅಲ್ಪ ಕಾಲಕ್ಕೆ ಭಾರತಕ್ಕೆ ಬಂದವರು ಹೊಸದುರ್ಗದಿಂದ ಮೂಡುಬಿದಿರೆಗೆ ಕೇವಲ ಭೇಟಿಯಾಗಲಿಕ್ಕಾಗಿಯೇ ಬರುತ್ತಾರೆ ಎಂದು ನಾನು ಊಹಿಸಿರಲಿಲ್ಲ.

ಹಲವು ಮಿತ್ರರ ಪ್ರಕಾರ ರವಿ ಹಂಜ್ ಬಲಪಂಥೀಯರು( ಹಾಗೇ ನನ್ನ ಬಗ್ಗೆ ಬೇರೆಯವರು ಅವರ ಮಿತ್ರರ ಬಳಿ ಅವರ ವಿರೋಧಿ ಪಾಳಯದವನೆಂದು ಹೇಳಿಯೇ ಇರುತ್ತಾರೆ ಬಿಡಿ). ಬಲಪಂಥೀಯರಾಗಿದ್ದರೆ ತಪ್ಪೇನೂ ಇಲ್ಲ. ನನ್ನ ಸ್ನೇಹದಲ್ಲಿ ವ್ಯತ್ಯಾಸವೂ ಆಗುವುದಿಲ್ಲ. ಸಂಬಂಧಗಳು ಮನುಷ್ಯರ ನಡುವೆ ಬೆಳೆಯುವುದು; ಸಿದ್ಧಾಂತಗಳ ನಡುವೆ ಅಲ್ಲ. ಆದರೆ ರವಿ ಹಂಜ್ ಬಲಪಂಥೀಯರು ಎಂದು ನನಗನಿಸಲಿಲ್ಲ. ಎಡಪಂಥೀಯರ ಬಳಿ," ನೀವು ಅಬ್ರಾಹ್ಮಣರ ಜಾತಿವಾದಕ್ಕೂ, ಹಿಂದೂಗಳಲ್ಲದವರ ಕೋಮುವಾದಕ್ಕೂ ಯಾಕೆ ಸರೆಂಡರ್ ಆಗಿದ್ದೀರಿ?" ಎಂದು ಕೇಳಿದರೆ ಅದು ಎಡಪಂಥೀಯರಿಗೆ ಕೇಳಿದ ಪ್ರಶ್ನೆಯೇ ಹೊರತು ಅವರ ನಿರಾಕರಣೆಯಲ್ಲ.‌ ಸೃಜನಶೀಲನಾದವನು ಪ್ರಶ್ನೆ ಮಾಡದೆ ಇರುವುದಿಲ್ಲ. ಉತ್ತರಿಸುವ ಶಕ್ತಿ ಇದ್ದವರು ಉತ್ತರಿಸುತ್ತಾರೆ. ಉತ್ತರಿಸುವ ಶಕ್ತಿ ಇಲ್ಲದವರು, ತಾವು ಪ್ರಶ್ನಾತೀತರು ಎಂದು ನಂಬಿಕೊಂಡವರು ಪ್ರಶ್ನೆ ಕೇಳಿದವನು ತನ್ನ ಸೈದ್ಧಾಂತಿಕ ವಿರೋಧಿ ಎಂದು ಬ್ರಾಂಡ್ ಮಾಡುತ್ತಾರೆ ಅಷ್ಟೆ. ರವಿ ಹಂಜ್ ಅವರು ವಿಚಾರ ಸಾಹಿತ್ಯದಲ್ಲಿ ಆವಿಷ್ಕೃತ ಐಡಿಯಾಗಳನ್ನು ಹುಟ್ಟು ಹಾಕುತ್ತಿದ್ದಾರೆ. ಅದೇ ಒಂದು ಆಲೋಚನಾ ಕ್ರಮವಾಗಿ ಹಲವರಿಂದ ಬೆಳೆದಾಗ ಎಡಬಲವಲ್ಲದ ಸಾಧ್ಯತೆಗಳು ಸಿಗುತ್ತವೆ.‌ ರವಿಯವರು ಎಲ್ಲೂ ಬಲಪಂಥೀಯರ ಹಾಗೆ ಕಥೆ ಹೇಳಿದ್ದು ನಾನು ನೋಡಿಲ್ಲ. ಅವರ ವಿಚಾರವನ್ನು ಹೇಳಲು ಅವರು ಕೊಡುವ ದಾಖಲೆಗಳು ' ಪಕ್ಕಾ' ಇರುತ್ತವೆ. ಆದ್ದರಿಂದ ನನ್ನ ಇಷ್ಟದ ಲೇಖಕರಲ್ಲಿ ಅವರೂ ಒಬ್ಬರು.

ಬಹಳ ದೀರ್ಘವಾದ ಮಾತುಕತೆಯಲ್ಲಿ ಅವರ ಕಂಪನಿ, ಅಮೆರಿಕದಲ್ಲಿನ ಜೀವನ ವ್ಯವಸ್ಥೆ ಇತ್ಯಾದಿಗಳ ಚರ್ಚೆಯಾಯಿತು. ರವಿಯವರ ಸಹಜತೆಯ ಒಡನಾಟ, ವಿನಯ, ನಿಷ್ಠುರತೆಗಳು ಹಿತಾನುಭವವನ್ನು ನೀಡಿದವು.