ಹಗೆದಿಬ್ಬೇಶ್ವರನ ಕಾಲಜ್ಞಾನ ವಚನ.

 ಮುಂದಣ ಕಲಿಯುಗದ ಮಹಾತ್ಮೆಯನು ಮರ್ತ್ಯಲೋಕದ ಮಹಾಗಣಂಗಳು ಕೇಳಿ ಕೃತಾರ್ಥರಾಗಿರಯ್ಯ! ನಾನು ಹೇಳುವನಲ್ಲ. ಇದು ಹಗೆದಿಬ್ಬೇಶ್ವರನು ಕೊಟ್ಟ ನಿರೂಪವು ಕಾಣಿ.

ಪಂಚಾಶತ್‌ ಕೋಟಿ ಭೂಮಂಡಲದ ಮಧ್ಯದಲ್ಲಿ ಪೃಥ್ವಿಗೆ ಕೈಲಾಸಮಪ್ಪ ಚಂದನವನದ ಮೂಡಲ ಬಾಗಿಲು ಮುಚ್ಚೀತು. ಮನುಷ್ಯರ ರಕ್ತ ಬೆಳ್ಳಗಾದೀತು. ಸುರೆಯ ಗಡಿಗೆ ಆಳೀತು. ವೇಶಿಯರ ಸೆರಗಲ್ಲಿ ಆಡಳಿತ ಕಟ್ಟೀತು. ಅಲ್ಲಿ ನಾನಾ ವಿಕಾರಂಗಳಾದಾವು. 

ಎಪ್ಪತ್ತೇಳು ಮಲೆಗಳು ಅಪವರ್ಗವಾದಾವು. ಲಿಂಗ ಕೆಟ್ಟು ಭಿನ್ನವಾದೀತು. ಮನ್ಮಥಕೊಂಡ ಉರಿದೀತು. ಯವನರ ಬಲವೆದ್ದೀತು. ಶಂಭುಲಿಂಗದೇವರ ಮುಂದಣ ಮೇಳದ ಮಂಟಪದಲ್ಲಿ ಕಪಿಲೆಯ ಬಾಣಸವ ಮಾಡ್ಕಾರು. ನಂದಿಕಂಭ ಮುರಿದಾರು. ಶಿಶ್ನಕಂಬವ ಕುಣಿಷ್ಯಾರು. ಛಪ್ಪನ್ನೈವತ್ತಾರು ನಾಯಕರು ಮಡಿದಾರು. 

ಪರಮತ ಬಲ ಆರಾದೀತು. ಆರು ಮೂರಾದೀತು. ಮೂರು ಎರಡಾದೀತು. ಎರಡು ಒಂದಾದೀತು. ಶಿವಸಮಯ ಕೆಟ್ಟೀತು. ಹಿರಿಯರ ಹಿರಿಯತನವಳಿದೀತು. ಷಡುದರ್ಶನ ಕೆಟ್ಟಾವು. ಏಕ ದರುಶನದಲ್ಲಿ ಅಡಗೀತು. ಮೂದೇವಿ ಬಂದಾಳು. ತೊಡೆಯ ತಟ್ಯಾಳು. ಸಂಗಮದೇವನ ಲಿಂಗಮದೇವ ಮಾಡ್ಯಾಳು. ಜಗದ್ಗುರು ನಾಲ್ಕಾದಾರು. ಅವರು ಮೂದೇವಿಗೆ ಶರಣೆಂದಾರು. ಭಕ್ತರು ಜಂಗಮದ ಕೈಸೇವೆಯ ಮಾಡಿಸಿಕೊಂಡಾರು. ನಿಜಭಕ್ತಿಯ ಮರೆತಾರು. ದಾಕ್ಷಿಣ್ಯ ಭಕ್ತಿಯ ಮಾಡ್ಯಾರು. ಕ್ರಿಯೆಗಳಂ ಬಿಟ್ಟಾರು. ಅನೇಕ ನೇಮಂಗಳಂ ಮಾಡ್ಯಾರು ಪ್ರಸಾದವಂ ಬಿಟ್ಟಾರು. ಮನೆಯ ಹಿರಿಯರಂ ಮರೆತಾರು. ಜಂಗಮರ ನಿಂದ್ಯವಂ ಮಾಡ್ಯಾರು. ಮತ್ತೆ ಜಂಗಮದ ಪ್ರಸಾದವಂ ಕೊಂಡಾರು. ಭಸಿತ ರುದ್ರಾಕ್ಷಿಯಂ ತೊಟ್ಟಾರು. ವಿಷಯಂಗಳೊಳಗೆ ಮುಳುಗಾಡ್ಯಾರು. ಹದಿನೆಂಟು ಜಾತಿ ಹರಕೊಂಡು ಉಂಡಾರು. ಕುಲಕ್ಕೆ ಹೋರಾಡ್ಯಾರು. 

ಅನರ್ಥವ ನುಡಿದಾರು. ಅನರ್ಥಕ್ಕೆ ಗುದ್ದಾಡ್ಯಾರು. ನಮ್ಮ ಶರಣರ ಹೆಸರೀಲೆ ಹಲವು ಸುಳ್ಳನಾಡ್ಯಾರು. ಅನಾಹುತವ ಮಾಡ್ಯಾರು. ಲಿಂಗಾಹತವ ನಡೆಸ್ಯಾರು. ಆದರೂ ಹೊಳ್ಳು ಜಳ್ಳಾಗಿ ಹೋದಾರು.  

ಜನಗಳು ದನಗಳಾದಾರು. ತರುಗಾಹಿ ರಾಜ್ಯವನಾಳ್ಯಾನು. ಪ್ರವಾದಿಯೇ ಪರಮವೆಂದಾನು. ಸನಾತನವ ಹಳಿದಾನು. ಅಕಾಲ ಮಳೆಯಾದೀತು. ಅನ್ನವ ಬೆಳೆವ ಭೂಮಿ ಸುಡುಗಾಡಾದೀತು. ಅಲ್ಲಿ ಜೀವಂತ ಶವಗಳು ಮನೆಯ ಕಟ್ಯಾವು. ಉಳ್ಳಿ ತೆಂಗಿನಾರಷ್ಟಾದೀತು. ಬಂಗಾರವು ಪ್ಲಾಟಿನದ ಮೂರರಷ್ಟಾದೀತು. ಅಕ್ಕಿ ಚೆಲ್ಲಾಡಿ ರಾಗಿ ಅಪರೂಪವಾದೀತು. ಎತ್ತು ಈದೀತು. ಕತ್ತೆ ಆಕಾಶದಲ್ಲಿ ಹಾರೀತು. ತಲೆಗಿಂತ ತರಡು ದಪ್ಪವಾದೀತು. ಕೇಯಕವೆ ಕಾಯಕವಾದೀತು. ಬೀಜವೊಂದೇ ಉಳಿದೀತು.

ನಮ್ಮ ಪುರಾತರ ಶರಣರು ಬೀಜಕ್ಕೊಬ್ಬರುಳಿದಾರು. ಮತ್ತೆ ಷಡುದರುಶನವೆದ್ದೀತು. ನಿರಂಜನ ಜಂಗಮವಂಶದಲ್ಲೊಬ್ಬ ವೀರ ಹುಟ್ಯಾನು. ಹುಂಜನಾಗಿ ಕೂಗಿ ಏಳಿಸಿಯಾನು. ಪೂರ್ವದಲಿ ಪುಟ್ಟಿ ಪಶ್ಚಿಮಕ್ಕೆ ಪೋದವ ಮತ್ತೆ ಪೂರ್ವಕೆ ಬಂದಾನು. ಹುಂಬನಾಗಿ ಕೂಗಿಯಾನು. ಸುಳ್ಳರ ಕಟಕಿಯಾಡ್ಯಾನು. ದುರ್ಗದಲ್ಲೊಬ್ಬ ಅವನ ಜೊತೆಯಾದಾನು. ಮಳ್ಳರ ಮಗ್ಗುಲು ಮುರಿದಾನು. ಜಗಕೆ ಶಂಕರಿಯ ಕುಡಿಸ್ಯಾನು. ಆನಂದವ ತಂದಾನು.

ಹುಚ್ಚು ಕಮಂಗಿಗಳಾ ಎಚ್ಚರಾದರೆ ಏಳಿ, ಇಲ್ಲವಾದರೆ ನೆಗೆದು ಬೀಳಿ. ಕಲಿಯುಗದ ಮಹಾತ್ಮೆಯನು ಮರ್ತ್ಯಲೋಕದ ಮಹಾಗಣಂಗಳೇ ಕೇಳಿ ಕೃತಾರ್ಥರಾಗಿ. ಏಳಿ ಎಚ್ಚರಗೊಳ್ಳಿ. ಇಲ್ಲಾ ನೆಗೆನೆಗೆದು ಬೀಳಿ. ಇದು ಹಗೆದಿಬ್ಬೇಶ್ವರನು ಕೊಟ್ಟ ನಿರೂಪವು ಕಾಣಿ.

#ಭಾರತವೆಂಬೋಹುಚ್ಚಾಸ್ಪತ್ರೆಯಲ್ಲಿ 

#ಕರ್ನಾಟಕವೆಂಬೋಕಮಂಗಿಪುರದಲ್ಲಿ